No Longer His Submissive Wife

“Mommy, love mo ba si daddy?” 

Napangiti si Zylah Almendras sa tanong na iyon ng pitong taong gulang na anak—si Jaxon. Nakaupo sila sa sofa sa salas at katatapos lang nilang kumain ng hapunan. Kasalukuyang nakabukas ang TV dahil maaga pa naman, alas-otso pa lang ng gabi.

Sa isang dekadang pagsasama nila ni Bryce ay masaya sila lalo na at may isang anak silang bumubuo sa kanila.  Kontento siya sa buhay bilang hands-on mom sa anak at mabuting may bahay sa asawa.

“Oo naman, s’yempre,” tugon ni Zylah sa tanong ni Jaxon at masuyong nginitian ito. 

“Pero si daddy love ka rin ba?” 

Muling ngumiti si Zylah dahil sa pangalawang tanong ni Jaxon. Hinaplos niya ang likod ng ulo ng anak na nakaupo sa tabi niya. “Oo naman. Love din s’yempre ni daddy si mommy.”

“Eh, bakit mas masaya si daddy kapag kasama si—” Tunog mula sa tablet ni Jaxon ang pumutol sa sasabihin pa sana nito. Binalewala na nito kasunod ang ina at nakangiti na sa kung anong tinitingnan sa tablet. “Mommy?” muling tawag nito kay Zylah.

“Hmm?” 

"Kailan ba kayo maghihiwalay ni daddy?” 

Natigilan si Zylah at napatitig kay Jaxon. "Ano ‘yon, Jax?" masuyong tanong pa rin ni Zylah. Iniisip na baka mali ang narinig mula sa anak. Baka naman nalito lang siya dahil may pinapanood na balita nang may itanong ito.  

Tinitigan siya ni Jaxon, "Ayaw mo ako bigyan ng ice cream lagi, ‘di ba?" 

Napangiti si Zylah sa narinig. Iyon pala ang dahilan. Napabuntong hininga na lang siyang tinitigan ang anak na nakatingin na naman sa tablet nito. Hindi naman sa ayaw niyang bigyan ng ice cream si Jaxon, nataon lang na may CSID ito. 

Congenital Sucrase-Isomaltase Deficiency. Isang kondisyon kung saan nagkukulang ang katawan ni Jaxon sa pag-produce ng enzymes para sa pag-break down ng sugar na nako-consume nito. Kapag napasobra si Jaxon sa sugar ay pwede itong kabagan, maging bloated, at magka-diarrhea. At iyon ang dahilan kaya nililimatahan niya ang sugar intake ng anak. Mas mabuti na ang sigurado sa kalusugan ni Jaxon kaysa magpabalik-balik ito sa ospital. 

“Hindi naman sa ayaw…” nakangiting wika ni Zylah. “Hindi lang pwedeng palagi kasi—”

“Antok na ako,” sabi ni Jaxon. Tumayo na ito at pumunta ng kuwarto. 

Naguguluhang sinundan ng tingin ni Zylah ang anak at saka kinuha ang remote control ng TV para i-off iyon. Tumayo na rin siya para samahan si Jaxon sa kuwarto nito hanggang makatulog. Dala ni Jaxon ang tablet nito pero dahil hindi nila sinanay ang anak gumamit ng tablet kapag nasa higaan ay babasahan na lang niya ito ng kuwento.

Napadaan si Zylah sa kuwarto nilang mag-asawa at nakita niyang may kausap si Bryce sa phone. Nakaupo ito sa kama at kaharap ang laptop. Hindi na niya ito inistorbo at dumiretso na siya sa kuwarto ni Jaxon. Pagbukas niya ng pinto ng kwarto ni Jaxon, naabutan niyang tulog na ito. 

Zylah sighed. Mukhang nakatulog na si Jaxon sa kakapanood sa tablet nito o kakalaro. Bukas ay kakausapin niya ang anak at ire-remind na bawal ito sa gadget kapag nasa higaan na. Nilapitan niya ang anak. Kinuha niya ang tablet at inayos ang comforter nito bago hinalikan sa noo. “I love you, baby ko…” malambing na bulong niya.

Lumabas na si Zylah sa kuwarto ni Jaxon at papunta na sa kuwarto nilang mag-asawa nang tumunog dahil sa notification ang tablet na hawak niya. Nagtaka siya. Notification iyon ng isang app na hindi siya aware na mayroon ang tablet ng anak. 

Curiously, tiningnan ni Zylah ang screen ng tablet. She frowned sa nakita sa screen. Tama siya na sa isang messaging app ang narinig niyang tunog. At kaya may notification ay dahil may nag-send sa group chat ng mga pictures. Napatitig si Zylah sa pangalan ng group chat. Napakunot ang noo sa nabasa. 

Group Name: Happy Family ❤️

‘Happy family?’ nagtataka niyang tanong sa sarili at iniisip na baka GC iyon ng teacher ni Jaxon para sa mga estudyante nito. Kumibit-balikat na lang si Zylah at hinayaan na ang GC. Bukas ay ibibigay niya rin naman sa anak ang tablet bago ito pumasok sa school. Ipapatong na niya sa tokador ang tablet nang hindi sinasadya ma-click niya ang notification. 

“Teka…” kunot-noong wika ni Zylah. Nagtaka siya sa mga nakitang picture na mula sa may nickname na Mama Jessa. 

Curiosity won, inisa-isa na ni Zylah ang mga pictures na pinadala ng may nickname na Mama Jessa sa GC. Puro pictures ni Jaxon ang mga iyon kasama ang isang batang lalaki na kaedaran din ng anak niya. Kaklase siguro ni Jaxon at birthday ng batang lalaki na iyon dahil may cake na kasama sa kasunod na picture nito at naroon si Jaxon sa tabi. Hindi na siya napakali dahil may mali sa default profile ng GC, ngayon niya lang napansin na family picture pala iyon.  

Tiningnan niya ang picture ng GC at apat na tao lang ang naroon, si Jaxon, ang batang lalaki, isang magandang babae at… at si Bryce! 

Nanikip ang dibdib ni Zylah. Tiningnan niya ang mga kasama sa GC. And she was shocked to see na apat lang ang members ng GC. Hindi iyon GC ng isang classroom kung gano'n. 

‘Happy Family nga, ‘di ba?’

Para matapos ang pagdududa niya ay tiningnan niya kung kaninong account ‘yong Mama Jessa sa GC. Jessa Moreno ang account name nito. 

Jessa Moreno… Bakit pakiramdan niya ay iyon na rin si Jessica Anne, ang ex at first love ni Bryce? 

“Ano na nga ang apelyido ni Jessica Anne?” pabulong na tanong ni Zylah sa sarili. 

Gusto niyang isipin na mali siya sa hinala nang may panibagong pinadala si Jessa sa GC. A video. She clicked it to play at nanlaki ang mga mata niya sa nakikitang kasiyahan ng apat na tao na naroroon. Compilation ng video ng mga masasayang tagpo sa amusement parks, fast food resto, at pool and beach escapades. 

Patuloy niyang pinanood ang video kahit naninikip na ang dibdib niya. Sa dulo ng video ay si Jaxon ang naroroon. Birthday ni Jaxon iyon at ngayon niya lang naunawaan kung bakit sabi Bryce nakaraan sa kaniya ay kailangan matuloy ang birthday ni Jaxon kahit hindi pa makauwi ang mag-ama niya mula sa Baguio at naiwan siya sa QC. May sakit siya noon kaya hindi siya nakasamang bumyahe ng mag-ama. Ang sabi ni Bryce ay gustong makasama ng mga magulang nito ang anak nila kaya isinama sa byahe. Hindi na nakabalik ang mga ito agad dahil sa kung anong okasyon pala na sinadyang hindi siya isama. 

“What's your wish, Jaxon?” tanong ni Jessa mula doon sa video. Katatapos i-blow ni Jaxon ang candles ng birthday cake nito. 

“Ang wish ko… ikaw na ang maging mommy ko.”