الفصل الثالث والعشرون

كم آلمتها كلمته ... دعست على جرحها الدامس بقلبها ... فردت بإبتسامة خافتة

:- يمكن أكون كدة فعلا ... بس انا فعلا مش بحب الزحمة ...

رد بإبتسامة ودودة

:- انا بقى عكسك تماما ... بحب الناس والزحمة والدوشة ... بحب اتكلم وأعرف مشاكل الناس ... ما هى شغلتى بقى

قالت أميرة مستفهمة

:- ليه أنت بتشتغل ايه

عدل من هندامه وقال بثقة مزيفة

:- دكتور نفسى ...

قطع حديثهم إقتراب عمر بنظراته الغامضة ... تطلع الى أميرة وقال بلطف

:- لو سمحتى يا أميرة روحى لجدك علشان عايزك

تحركت من أمامهم مسرعة... أما إسلام فإبتسم لعمر بثبات

:- أنا عارف إنت بتعمل ايه يا عمر ... مصمم تبعدها عنى .. بس يا ترى ايه السبب ... بتحبها ... ولا غلاسة وخلاص ...

بادله عمر ابتسامته بأخرى ساخرة وقال

:- وإنت بقى عامل الدكتور الروش اللى بتفهم الناس من عينيها بقى وكدة...

بس عايزك تعرف ان أميرة تخصنى .... ومش هسمحلك تقرب منها بأى شكل من الأشكال ... فأبعد بنفسك كدة بالزوق بدل ما أخليك تبعد بالعافية ...

قهقه إسلام عاليا ليرد بثبات

:- هو من ناحية إنى بعرف اقرا الناس من عينيها فدى شغلتى ما انا دكتور واعرف احلل تصرفاتك كويس ... اما بقى موضوع أميرة فأنا شايف إنك مش fear يا صديقى

نظرات عمر قاتلة فقد تمكن منه الغضب فأردف إسلام

:- يعنى المفروض تسيبها هى تختار ولا إنت خايف متختاركش ...

أجابة عمر بنبرة تحذيرية

:- لأ ما انت ما تعرفش ... انا الموضوع دة عندى مفيهوش إختيار .... الحب عندى بالإجبار

ثم أكمل بطريقة حاول جعلها هادئة

:- إبعد أحسن يا إسلام ... ما اتمناش فى يوم تحصل بينا مشكلة ...

وتركه ورحل يفكر فيما قال ...

عاد خالد الى نور سريعا وأعطاها الدبوس نظرت له مستفهمة

فقال

:- إقفلى البلوزة من فوق ...

بحركة تلقائية أمسكت بلوزتها تغلقها بقوة ونظرت له بحرج وأخذت منه الدبوس سريعا فأولاها ظهره مدعيا إنشغاله بشئ فى هاتفه ....

أغلقت بلوزتها بالدبوس وشكرت له فى نفسها ما فعل ..

أشار الى أميرة التى تقف بجانب جدها لتأتى فقال

- أميرة أختى الصغيرة يانور ... وأخت حسن

بادلتها نور السلام بحب وقالت بصدق

:- أنا مليش صحاب يا أميرة ياريت تكونى صاحبتى ..

.

فرحت أميرة ... فكم تمنت ان يكون لديها أصدقاء تقص عليهم ما يحدث معها وتأخذ أراءهم وتشاركهم حياتها ... لكن أسلوب حنان الفظ معها جعلها تتراجع عن ذلك ....

رحبت بالفكرة وتحدثت

:- ياريت يا نور أنا كمان معنديش أصدقاء خالص و على طول لوحدى ...

تركهم خالد يتبادلون أطراف الحديث فمن الواضح انهم يشعرون بالارتياح كل تجاه الاخر واتجه الى جده الذى يتطلع الى حسن بفرح ...

لثم رأس جده بقبلة حانية .... فنظر له الجد بابتسامة صافية وقال

:- عقبالك يا حبيبى

والقى نظرة ماكرة على نور ثم اردف

:- بس وقعت واقف ياض يا خالد

ضحك خالد عاليا وقال وهو يجلس بجوار جده وقرر أن يجاريه فلا فائدة من الإنكار ... خاصة وقد عزم أمره ان يتقدم لخطبتها ولكن سينتظر بعد تثبيت أقدام عمله الخاص أولا ...

فقال وهو يبتسم بثقة

:- عيب عليك يا حاج ... هو بصراحة انا مكنتش ناوى أقع بس الللى حصل بقى ...

قهقه رضوان عاليا وحانت منه نظرة الى عمر فتسلل الحزن الى وجهه وقال لخالد

:- عمر مخبى حاجة يا خالد ... والحاجة دى مخلياه مش راضى يتقدم لأميرة ولا حتى يعترف بده ... وانا قلقان عليه بصراحة ...

بينما تحدث خالد بعقلانية مطمئنا لجده

:- متقلقش يا حاج .... انا مش عارف هو مخبى ايه بصراحة ومش عارف بردو ناوى يقول ولا لأ ... بس اللى متأكد منه انه قريب أوى هتلاقى جاى وبيطلب إيديها منك ... انت مشوفتهوش هياكل إسلام إزاى ... دة مش طايق حد يقرب منها ...

ابتسم رضوان وقال

:- والله إسلام شكله معجب بيها وممكن يسبقه ويتقدملها وساعتها مش هعرف أعمله حاجة هو حر

" ثم تابع بحزن" ... ما انا بردو يا خالد عايز اطمن عليها مع جوزها .... مش هفضل أرفض فى العرسان على الفاضى وهو واقف محلك سر ومش راضى يتحرك .. أديك شايف مامتها وأسلوبها معاها ...

شعر خالد بالحزن فى عيني الجد رضوان فحاول أن يطمئنه فقال بجدية

:- سيبلى الموضوع دة يا حاج وأنا هتصرف فيه ... مش عايزك تقلق

أومأ الجد رأسه بالموافقة وربط على رجل خالد بمحبة

:- إنت ذراعى اليمين يا خالد فمعلش بقى لو لقيتنى بتقل عليك ... بس انا عارف إنك قدها

نظر له خالد بإمتنان على ثقته به وربت على يده وقال

:- لا يا جدى أرمى عليا زى ما انت عايز وانا أقولك حاضر وينفذ ...

ابتسم له رضوان بدفء نابع من القلب ... داعيا له ان يحفظه ويريح قلبه ... ويزيح همه .... ويرزقه الصلاح دوما ....