الفصل السادس والعشرون

فى تلك الحارة المتهالكة ... ذات الأزقة الضيقة ... والبيوت الصغيرة المتراصة ... وصل خالد ومعه نور الى الورشة التى ستقوم بتنفيذ تصميماته ... القى التحية على صاحبها ... وكان رجلا وقورا ملأ الشيب رأسه ... ورسم الزمن آهاته على خطوط وجهه ... لكنه بشوش بشكل مريح للأعصاب ...

نادى المعلم صبرى أحد الشباب الذى يساعده بالعمل ليحضر كرسيين ليجلسا عليهم ...

بادر خالد بالحديث فتحدث بهدوءه ولباقته المعهودة

:- انا جيبت التصميمات اللى اتفقنا عليها يا معلم صبرى تقدر تشوفها وتقولى هتخلصها فى وقت أد ايه ...

ابتسم له المعلم صبرى

:- مستعجل على إيه يا بشمهندس مش تاخدوا واجبكم الأول وبعدين نتكلم فى الشغل

بادله خالد إبتسامته وقال

:- ملهوش لزوم احنا هنتكلم كلمتين فى الشغل ونتوكل على الله ...

لم يستمع إليه المعلم صبرى ونادى على الفتى الذى يعمل بالمقهى المجاور وطلب منه مشروبات للترحيب بالضيوف ....

بعد وقت الوقت تطلع المعلم صبرى على التصميمات وقال

:- التصميمات ذوقها عالى أوى يا بشمهندس .... انت اللى مصممها لوحدك ...

حانت منه نظرة الى نور و رد بإبتسامته الهادئة ...

:- انا اللى راسم التصميم و نور هى اللى عدلتهم علشان تطلع بالشكل اللى حضرتك شايفه دة ...

تطلع اليهم المعلم صبرى بنظرة ثاقبة وقال

:- انا شايف انكوا فريق حلو .... وطول ما انتو بتشتغلوا مع بعض كدة هتطلعوا حاجات مميزة فعلا ...

أخفضت نور نظرها بخجل فبادر خالد بسؤاله

:- طيب حضرتك محتاج وقت أد ايه علشان تنفذهم...

فقال

:- إنت قدامك وقت اد ايه ؟

فتحدث خالد بصدق

:- بصراحة انا محتاجهم فى أقرب وقت ...

أومأ له برأسه متفهما و رد

:- انا هبدأ شغل فيهم من النهاردة ... و بعون الله نخلصهم بسرعة ...

هم خالد وتبعته نور وسلم على المعلم صبرى وقال

:- إن شاء الله تكون بداية خير لينا مع بعض وهنتابع معاك انا او نور ...

قال المعلم صبرى

:- ابنى هو اللى مسئول عن الشغل ولو مليقتونيش هتلاقوه ان شاء الله ... هو إسمه عبد الرحمن

أومأ له خالد برأسه وقال

:- تمام هسجل الرقم وأتابع معاه ...

وإنصرفا الاثنين الى طريق أخر ....

**********

فى مكان اخر بنفس الحارة عادت سارة من عملها متذمرة كعادتها

وجدت أمها بالمطبخ وعندما استمعت لها نادية خرجت مسرعة والأبتسامة الطيبة تملأ وجهها وقالت مهللة

:- حمد لله على السلامة يا حبيبتى

نظرت له سارة بإستغراب وقالت

:- ايه فى ايه ... مش مرتاحة للدخلة دى ...

اقتربت منها أمها وأكملت

:- ليه بس يا بنتى ... دة العادى بتاعى بس إنتى اللى على طول مكشرة ومش طايقة حد ...

لم ترد سارة واتجهت الى غرفتها فهتفت أمها

:- رايحة فين ... مش هتتغدى ... دة انا عملالك أكل هتاكلى صوابعك وراه ...

أكملت سارة طريقها الى غرفتها وقالت

:- شبعانة مش عايزة اتغدى ... عايزة أنام

هرولت اليها أمها وتحدثت

:- لا نوم ايه ... دة احنا جاييلنا ضيوف انهاردة ...

تطلعت لها سارة بتهكم وقالت

:- واحنا من إمتى بيجلنا ضيوف ... دة احنا مقطوعين من شجرة

.... وبعدين حتى لو حد جاى انا مالى.

تحدثت نادية تحاول التودد لابنتها فأقتربت منها تملس على شعرها بحنو ...

:- انتى مالك ازاى ... اللى جايين دول جايين علشانك انتى ... مش إنتى العروسة ...

نفضت يد أمها بعنف وقالت بغضب

:- عريس ايه وزفت ايه ... قولتلك ١٠٠ مرة انا مش هتجوز من الحارة دى ... انا يوم ما هتجوز ... هتجوز واحد ينشلنى من الأرف اللى انا عايشة فيه

استطردت نادية حديثها مستمرة فى إقناع سارة بالعريس

:- يا بنتى دة الأستاذ عبد الرحمن بسم الله ما شاء الله عليه ... مفيهوش غلطة والف واحدة تتمناه ... لولا بس ان هو بيحبك وشاريكى كان زمانه دلوقتى متجوز ومعاه أورطة عيال

قالت بسخرية

:- لا يا ختى قوليلو يشوفله واحدة تانية يحبها ويتجوزها ... وابقى قوليلوا كمان ما يبصش فوق علشان رقبته متتكسرش ....

تحدثت ناديه بعدان فقدت الأمل فى ابنتها

:- يا بنتى امه جاية انهاردة ... اقولها ايه بس ... طب حتى اطلعى سلمى عليها وأقعدى معاها شوية وبعدين ادخلى اوضتك تانى

هتفت

:- انا مديتش لحد مواعيد علشان ابقى ملزمة اقابلها بس لو انتى مصممة يبقى متزعليش بقى لما احرقلك دمها علشان تحرم تسمع كلام ابنها تانى .... وبعدين هو علشان سهى اتجوزت ابنها كمال يبقى بالمرة سارة تتجوز عبد الرحمن .... ما هو سبت بطاطس بياخدوه شروة ...

حركت الأم رأسها بيأس وخرجت وهى تفكر كيف ستعتذر لهم

أخذت هاتفها واتصلت على ابنتها الكبرى سهى بعد ان تبادلوا التحية بادرت نادية قائله

:- أختك يا سهى منشفة دماغها على الاخر .... ومش عارفة أعمل معاها ايه

ردت

:-؛ ليه يا ماما هى مش موافقة بردو على عبد الرحمن ... والله دة بيموت فيها ومن زمان كمان .... وجدع وابن حلال يعنى هيصونها ويحافظ عليها ...

قالت

:-؛ ما انا عارفة يا سهى كل دة ... بس أعمل ايه فيها طول عمرها بتبص لفوق ... وحاطة عينيها على حد غنى من الشركة اللى بتشتغل فيها ... المهم دلوقتى أعمل ايه فى حماتك اللى المفروض جاية معاكى بعد المغرب دى

ردت سهى بقلق

:- مش عارفة يا ماما .... هو مفيش أمل خالص يعنى لو كلمتها مش ممكن توافق ...

اسرعت نادية

:- لا أوعى تكلميها ... هى متربسة دماغها وحالفة لو حد كلمها تانى هتطلع تبهدل الست برا ...

فكرت سهى قليلا وقالت

:- خلاص احنا هنيجى عادى وهى لو سألت ابقى قوليلها انها تعبانة وكدة وجت من الشغل نامت على طول ....

وافقت نادية بيأس وأغلقت الهاتف وذهبت تكمل ما كانت تفعله بالمطبخ ....

بعد بعض الوقت وصلت سهى وحماتها ... استقبلتهما نادية بترحاب شديد يشوبه بعض التوتر لكن حاولت سهى ان تتدارك الأمر...

قالت أم كامل

:- انتى عارفة يا نادية غلاوتك عندى أد ايه انتى والبت سهى دى ولولا كدة مكنتش فكرت أسمع كلام عبد الرحمن واجى اخطبله سارة ...

ردت ناديه بارتباك فهى تعلم ان جميع جيرانها لا يحبون سارة لتكبرها وطريقتها المتعالية معهم

:- ليه بس كدة يا أم كامل دة احنا اهل ونسب

تحدثت

:- متأخذنيش يا نادية سارة مش زى سهى .... سهى دى أميرة وتتحط على الجرح يطيب ... لكن سارة شايفة نفسها و مبتطقش حد .... دة انا حتى عمرى ما شوفتها بتضحك فى وش عيل صغير ...

رغم علمها حقيقة ما تفوهت به الماكثة أمامها ... إلا ان غريزة الأمومة بداخلها جعلتها تشعر بالحنق تجاهها ... كيف لها ان تتحدث هكذا عن إبنتها ... أمامها .... وفى بيتهم

فقالت بنبرة جاهدت ان تكون لطيفة

:- يبقى ملهوش لزوم موضوع سارة دة وخلينا كدة أهل وحبايب أحسن

لوت الأخرى فمها وقالت بضيق

:- يا ريته بمزاجى يا نادية .... عبده بيحبها ومن زمان وقاللى شوفى هى عايزة ايه وانا هعمله بس توافق "ثم غمغمت بحنق"

يمكن ترضى عننا ست الحسن والجمال ...

تطلعت حولها واردفت

:- أومال هى فين لسة مجتش من الشغل ولا ايه ؟

ردت نادية بتوتر

:- لا موجودة بس هى جت من الشغل تعبانه شوية ونامت ...

ابتسمت الأخرى بسخرية وقالت

:- لا ألف سلامة عليها .... ابقى شوفى رأيها و ردى عليا علشان انا إتأخرت ولازم أمشى ...

بعد وقت من المهادنات كى تنتظر قليلا .... أصرت أم كمال على الإنصراف فهى على يقين ان سارة لا تريد مقابلتها .... ولا توافق أيضا على الزواج من ابنها ولكنها فعلت ما عليها تجاه ولدها ولا يلوم أحد عليها ....