الفصل التاسع والعشرون

فى شقة هادئة بعض الشئ ... تتسم بالبساطة ... الوانها الناعمة ... أثاثها الجميل ... بيت زينه الرضا ليضيف الراحة على أرجاءه ....

كانت ترتدى منامة بيتية ناعمة ... ترفع شعرها لأعلى وتترك خصلات شاردة تزين وجهها لتزيده جمال ورقة ....

وقف عند باب غرفته يتطلع لها بحب ... عشق عمره ... وحبيبته ...و زوجته ...

اقترب منها ببطء وهى تضع الأكل على المائدة ...

إحتضنها من الخلف بحنو لتبتسم له بعشق نجح بزرعه بقلبها ..

همس بأذنها قائلا

:- هو قلبى بيحلو كل ما يكبر ولا أنا بيتهيألى

تعشق مشاكسته فقالت بدلال

:- لأ يا حبيبى ... انا مكبرتش .. انا لسة صغيرة ... وبعدين أنا طول عمرى قمر ...

ضحك على طريقتها و مال عليها قليلا وقبل وجنتها بهدوء وقال

:- حبيبى الواثق من نفسه ...

تطلع حوله وسألها

:- هو القرد الصغير بتاعنا فين ... نايم ؟

نظرت له بحنق مصطنع وأفلتت نفسها من بين زراعيه وقالت

:- متقولش على ابنى قرد ... وبعدين شبط فى جده ومرضاش يطلع معايا ... قاعد مع مامتك وباباك تحت ....

ابتسم بمكر وجذبها من معصمها لتسقط بين زراعيه مجددا وقال بمرح

:- أسفين لمعالى الباشا ... هو احنا نقدر نتكلم ونزعل القمر بتاعنا ... طيب بما إنه تحت ما تيجى أقولك حاجة مهمة أوى فى اوضتنا ...

اتبع كلماته بغمزة ففهمت ما يرمى عليه ...كادت ان تطيعه ولكنها تذكرت أمر أختها فقالت مسرعة

:- كامل صح ... كنت عايزة اتكلم معاك فى موضوع كدة ..

ضيق عينيه و نظر لها بخبث ثم رماها بابتسامة مشاكسة ...

انحنى قليلا وحملها بين ذراعيه وقال وهو يتجه لغرفتهما ...

:- ما هو دة اللى انا قولته ... عايزين نتكلم فى موضوع مهم ...

بعد وقت غاصا فيه بعالمهما الخاص ... اعتدلت فى جلستها بينما هو ممدد على السرير بجوارها يعبث بشعرها فقالت بخفوت

:- كنت عايزة أقولك على حاجة بس خايفة تزعل

دقق النظر بعينيها وقال

:- ومن إمتى وانا بزعل منك فى حاجة بتقوليها ...

ابتسمت له بحب واردفت

:- أنا شايفة إن عبد الرحمن يصرف نظر عن موضوع سهى دة ...

حرك رأسه بتفهم وقال وهو يعتدل بجلسته

هى مش موافقة مش كدة ....

تحدثت بحرج

:- مش كدة بالظبط انا متكلمتش معاها ... بس إنت عارف سهى ... طول عمرها بتبص لفوق ... وعايشة عيشة غير عيشتنا خالص ...

رد بهدوء

:- عارف كويس سهى بتفكر إزاى ... بس عبد الرحمن مش شايف دة ... او يمكن عارف بس مش عايز يصدق ... بيحبها ومش قادر يتخيل إنها ممكن ترفضه

اخفضت رأسها بأسف

:- وأنا مش عارفة اقول لمامتك إزاى ... شكلى وحش أوى ... وخايفة تحصل مشاكل تأثر علينا ... وعلى علاقتى معاهم ...

ضرب وجنتها بخفه وقال

:- مين دى اللى تأثر على علاقتنا ... دة انتى اللى فى القلب يا سوسو ...

متقلقيش هما هيفهموا مع الوقت .... وانا هحاول أتكلم معاه وأشوف اخرتها ايه ... بس لما نتأكد إنها مش موافقة ...

ربت على رأسها بحب وقال مؤكدا

:- أنا جمبك ... متخافيش

ارتمت بين أحضانه وغمغمت بهمس

:- عمرى ما تخيلت إن حياتى معاك هتبقى كدة ... كنت مفكرة إنها هتبقى عادى ... مكنتش أعرف إن ربنا رزقنى بأحن راجل فى الدنيا ... عوضى وسندى عن سنين كتير عذاب شوفتها ...

رفعت رأسها لتنظر الى لمعة عينيه التى زادت بريقها و تحدثت بخفوت

:- أنا بحبك أوى يا كامل ... ومتمناش أعيش يوم وإنت مش جمبى فيه ...

لثم جبينها بقبلة طويلة حانية وضمها بين ذراعيه بحب وقال

:- إنتى حياتى يا سهى ... الحلم اللى حلمت بيه زمان و ربنا قدرنى وحققته ... وربنا يقدرنى و اخليكى أسعد واحدة فى الدنيا

....

ابتسمت له وأغمضت عينيها لتهنأ بنوم هادئ بين أحضان زوجها ....

تجلس بغرفتها تتحدث بالهاتف ....

:- أنا مش مصدق يا عهدى إن خلاص كلها أيام وهتبقى معايا و فى حضنى ...

ابتسمت بخجل رغم ذلك الضيق الذى يشوب قلبها فقالت

:- انا اللى مش مصدقة اننا اتحدينا كل الظروف ... ورغم كل المشاكل اللى قابلتنا ... قدرنا نكمل ... و خلاص فرحنا بعد كام يوم ...

تذكرت أمر الزفاف لتسأله

:- حازم الفرح كمان كام يوم واحنا ولا اخترنا الفستان ولا اتفقت مع ميكب ارتيست و لا اى حاجة

أجابها بدبلوماسية

:- مش عايزك تشيلى هم أى حاجة ... كل حاجة هتكون جاهزة فى إستقبالك يا قلبى ...

لم يعجبها رده ... فابتسمت بسخرية على حالها ... كانت تتمنى ان تختار كل شئ يخصها ... ان تختار فستان زفافها بنفسها ... تشعر بالسعادة و هى تتنقل بين فستان واخر ... تعيش تلك التفاصيل الجميلة التى تعشقها الفتيات ... لكنها تنازلت ... وما عليها سوى الرضوخ ...

شعر بضيقها فسألها

:- لسة بردو نور وطنط سعاد مصممين ما يحضروش الفرح ...

غمغمت بأسى

:- لا يا حازم مفيش فايدة ... المشكلة انى بقيت بتعمد أضايقهم ... و بالذات نور ... كأنى بعاقبها علشان انا همشى واسيبهم ... كأنى قاصدة أكرههم فيا مش عارفة ليه ...

تحدث بهدوء

:- هما أكيد مقدرين اللى انتى فيه ... مش سهل انك تسيبيهم ...

بس دى سنة الحياة وكل واحد بيختار حياته ويعيشها زى ما هو عايز ... وإنسى موضوع انهم يكرهوكى دة ... دول روحهم فيكى

فمتخليش حاجة تأثر على علاقتكم مع بعض ...

أومأت رأسها بحزن ... فوجدته يسرع قائلا

:- هكلمك تانى يا عهد

وأنهى المكالمة ... والتفت الى والدته التى اقتحمت غرفته ... فسألته بسماجة

:- عهد دى ... عاملة ايه ...

:- كويسة يا ماما ... بس انا عايز أفهم كل أما اسألك عن الفستان او الفرح هيكون فين ... مش بتردى عليا ... و عهد بتسألنى وانا بردو مش عارف أجاوبها ...

جلست على حافة الفراش وجذبته من يده ليجلس بجوارها ...

وتحدثت بخبث ...

:- انت مفكر انى مش مهتمية بفرحك ... دة انا نفسى ومنى عينى أشوفك عريس ... بس فكر معايا كدة ... هنعمل فرح والناس هتسأل فين أهل العروسة هنرد نقول إيه ؟ شكلنا هيبقى وحش اوى وقتها ...

ثانى حاجة بقى هى نفسها ... تفتكر هتكون مبسوطة وهى لوحدها يوم فرحها ... وانت أهلك كلهم حواليك ... أكيد هتضايق ... وانا مرضاش بكدة أبدا ... عهد دى زى بنتى بالظبط ... وحاسة بيها وباللى هى فيه ...

تطلع لها بتوهان ... لا يعلم ماذا عليه ان يفعل .... فقال

:- يعنى ايه يا ماما مش هنعمل فرح ولا هجيبلها فستان زى أى عروسة ....

أسرعت تكمل خطتها

:-مين قالك كدة ... دة احنا هنجيبلها أحلى فستان ... فستان مكنتش تحلم بيه ...

بس الفرح بقى ... هنعمل حفلة صغيرة كدة على قدنا بس ... أهو نفرح ونفرحها معانا ... وفى نفس الوقت نرحم نفسنا من الكلام ....

قال بتفكير

:- بس هى كدة مش هتبقى فرحانة ... يعنى يا ماما ... مش كفاية ان مامتها واختها مش هيكونوا جمبها ... نكمل احنا عليها ومنعملش فرح ... ازاى يعنى ...

هتفت تقول بمكر

:- أديك قولتها بنفسك أهو محدش هيحضرلها فرحها ... يبقى عمرها ما هتكون فرحانة ... اما بقى لو عملنا حفلة على الضيق كدة ... مش هتحس انها غريبة وسطينا ... وهتقدر ان احنا راعينا مشاعرها ...

:- مش عارف يا ماما ... هقولها وأشوف رأيها ايه

هتفت سريعا

:- لا لا أوعى تقولها حاجة ... سيبها لما تيجى هتعرف كل حاجة هنا ....

نظر لها بشك ... لكن سرعان ما أنفضه عن عقله ... لا يريد ان تتعرض سعادته لأى نوع من الإنتهاك ... فتغاضى ... وسيتغاضى كثيرا ... فقط كى يحظى بها ...

ولكن هل ستسير أمورهم على ما يرام ؟

أم ستفرض عليهم الحياة ما لا يستطيعون تحمله؟

راق لها سكوته ... فشعرت أن خطتها تسير على ما يرام ...فابتسمت له و وربتت على كتفه وقالت

:- الف مبروك يا حبيبى ... انا مش مصدقة ان ابنى الصغير كبر خلاص وهيتجوز ... لأ وهيتجوز البت اللى بيحبها من وهو أد كدة ... يلا يا حبيبى ربنا يتمملك على خير ...

واستقامت من مكانها وذهبت مغادرة غرفته بإبتسامة ماكرة ...

فماذا سيحدث فيما بعد !!!