الفصل الواحد والثلاثون

احكيلي بقا اللي حصل بالظبط يا بشمهندس.. وعملت كدا ليه في البنت؟ اخلص واعترف!

— حسام (بقهر): يا فندم أنا معملتش حاجة ومستحيل ألمس شعرة منها! أنا ماليش أي مصلحة في موتها أو أذيتها، هعمل كدا ليه وعشان إيه؟! وبعدين دي مراتي اصلا!!

— الضابط (بمكر القانون): يمكن اكتشفت خيانتها ليك؟ أو حصلت مشكلة كبيرة واجهتك وعرفت إنها مش عوزاك وطلبت تنفصلوا، وطبعاً كبريائك كرجل شرقي مقدرش يستحمل، ففكرت تعتدي عليها وتحطها تحت الأمر الواقع وتكسر عينها عشان تضطر تكمل معاك وتتجوزك.. ولما قاومتك وصرخت، اتوترت وروحت خابطها على دماغها بالمزهرية عشان تسكتها، ووقعت! مش هو ده السيناريو برضه؟

— حسام (بفزع وصراخ): لا لا لا! محصلش.. مستحيل يحصل كدا! أنا عمري ما شكيت فيها ولا هي خانتني، وحتى لو حصلت بيننا أكبر مشاكل الكون عمري ما هتوصل بيا القذارة لكدا يا فندم! أنا بحب عاليا أكتر من نفسي ومن روحي، ولا يمكن أأذيها أو أشوفها بتنزف وأسكت!

— الضابط: طيب احكيلي بالتفصيل الممل، إيه اللي حصل من أول ما قابلتها يومها؟

— حسام: هي كانت مسافرة برة في شغل، روحت بنفسي المطار واستقبلتها وجبتها، وروحنا كافيه على النيل شربنا قهوة واتمشينا شوية .. وبعدين قالتلي إنها تعبانة جداً من السفر وعاوزة تروح تنام وترتاح.. وصلتها لحد باب الفيلا وهي طلعت، وأنا كنت لسه واقف تحت في الجنينة مستنيها تنور نور أوضتها وتشاورلي من البلكونة عشان أطمن وامشي.. بعد دقيقتين بالظبط، سمعت صوتها بتصرخ صريخ رعب يقطع القلب! اندفعت للباب الرئيسي وحاولت أفتحه كذا مرة، بس لقيت الباب متقفل ومتعشق من جوة ومش راضي يتفتح.. لفيت بسرعة وطلعت من مواسير البلكونات لحد ما وصلت أوضتها، دخلت لقيتها واقعه على الأرض غرقانة في دمها والمكان متبهدل.. لسه ملحقتش أنطق أو أستوعب الكارثة، لقيت حازم بيفتح الباب وبيدخل علينا.. طيب هو كان فين كل الوقت ده وصوت الصريخ عالي كدا؟!

— الضابط (وهو يدون): أخدت وقت قد إيه بالظبط ع ما تسلقت وطلعت الغرفة؟

— حسام: تقريباً من خمس لـ عشر دقائق.. مش قادر أحدد بالثانية من الرعب، بس هو في الحدود دي تقريباً.

— الضابط: واتحركت على طول أول ما سمعت أول صرخة؟

— حسام: أيوة طبعاً، في نفس اللحظة.

— الضابط: واتجهت للباب الأول ولا البلكونة؟

— حسام: لا.. روحت للباب الرئيسي الأول وحاولت أكسره ولما فشلت اتجهت للبلكونة واتسلقت.

— الضابط: كنت عارف موقع أوضتها بالظبط إزاي؟

— حسام: كانت بتستناني وتشاورلي منها قبل كدا كذا مرة، وكمان لما طلعت برة لقيت نور غرفتها نور واطفي ورجع نور وفضل بس هو اللي منور وباقي الفيلا ضلمة ومطفي، فتأكدت إنها هناك.

— الضابط: ومن وجهة نظرك.. إيه مصلحة حازم في إنه يعمل كدا في بنت عمه؟

— حسام (بغل): الانتقام والغل!.. حازم كان خطيبها زمان وضيعها من إيده، وحاول كذا مرة وبكل الطرق القذرة إنه يرجعها ليه بس هي كانت بترفضه تماماً وتصده، وبعدها ارتبطت بيا وبقينا لبعض.. وطبعاً هو مكنش مرحب بالجوازة دي وكان هيموت من الغيرة والغل، واستغل إن الفيلا فاضية عشان ينتقم لكرامته المهدورة!

— الضابط (بجمود): تمام.. خده برة على الحجز، ودخلي المتهم التاني حالا.

دخل حازم وهو يجر قدميه بتعب ووجهه شاحب، فجلس أمامه ونظر إليه الضابط بصرامة:

— الضابط: ها يا حازم.. ناوي تعترف وتخلصنا، ولا هتتعبنا معاك في الكلام والسين وجيم؟

— حازم (بضعف): أنا معملتش حاجة يا فندم والله العظيم صدقني.. أنا مستحيل ألمس عاليا بأذى!

— الضابط: البشمهندس حسام في أقواله بيقول إنك كنت خطيب المجني عليها السابق وإنك كنت حاقد عليها.

— حازم: دي حقيقة.. كنت خطيبها وفسخنا.

— الضابط: اممممم.. خليني أقولك بقا السيناريو اللي حصل بالظبط من واقع التحريات: الغيرة والغل عمت عيونك تماماً، حاولت تخليها ترجعلك بكل الطرق ومش راضية، وصممت تبعد وتتجوز حسام.. فخططت ونفذت النهاردة، استغليت إن أهلك كلهم في الفرح والفيلا فاضية تماماً، وحاولت تعتدي عليها وتجبرها وتنتقم لكرامتك المهدورة.. ولما قاومتك وصرخت، وسمعت صوت البشمهندس تحت وعرفت إنه ممشيش وواقف في الجنينة، اتوترت وخفت وروحت خابطها على دماغها بأقرب حاجة جنبك (المزهرية) وخرجت بسرعة، واستنيت لما هو دخل من البلكونة ودخلت أنت وراه علطول عشان تلبسه التهمة وتخلص نفسك! مش هو ده اللي حصل برضه؟

— حازم (بفزع وصراخ وهو يبكي): والله العظيم لا! والله ما حصل! لأ لأ.. أنا عمري ما أعمل كدا في عاليا أبداً!

— الضابط: طيب احكيلي إيه اللي حصل بالظبط من ساعة ما قعدت في البيت لوحدك؟

— حازم: أنا يومها العصر كان معايا واحد صاحبي اسمه مازن وجالي الفيلا، ومشي من عندي متأخر وقبل ما عاليا توصل . بعد ما مشي كنت حاسس بخمول وتعب شديد وعاوز أنام، بس كنت عارف إن عاليا جاية من السفر وبتخاف تفضل في الفيلا لوحدها والبيت ضلمة، فقلت أقعد استناها على الكنبة تحت في الصالة ولما تيجي أطلع غرفتي.. قعدت احاول منمش ومنمتش اعتقد غير ثواني وفجأة غبت عن الوعي تماماً ونمت نوم غريب وثقيل جداً كأني ميت! مصحتش غير على صوت صويت دوشة وجلبة جامدة أوي فوق.. بس مكنتش مركز ومدروخ وتعبان جداً ومش عارف أحدد الأصوات ولا إذا كنت بحلم كابوس ولا صاحي.. فجأة الصوت سكت وكل حاجة هديت، فوقت وطلعت فوق بسرعة أشوف في إيه، فتحت أوضة عاليا لقيتها واقعه على الأرض بتنزف وحسام قاعد جنبها بيعيط ومنهار! ده كل اللي حصل والله.

— الضابط (بشك): كنت شارب حاجة؟ أو متعاطي أي مواد مخدرة؟

— حازم: والله أبدًا يا فندم! أنا مبقتش أشرب حاجة خالص ونظيف.

— الضابط (وهو يفتح ملفاً أمامه): بس التقرير والملف الأمني بتاعك بيقول إنك كنت بتتعالج قريب جداً في إحدى المصحات النفسية من إدمان المخدرات والبودرة!

— حازم (بإنكسار): ده حقيقي وعمري ما أنكره.. بس أنا خفيت تماماً وطلعت، ومشربتش من وقتها أي حاجة أبداً ومستعد للتحليل حالا!

— الضابط: طيب.. عاليا وحسام كان في بينهم أي مشاكل أو خناقات الفترة الأخيرة؟

— حازم: الصراحة.. عمري ما سمعت عن أي مشكلة بينهم، وعاليا عمرها ما شكت منه لينا، بالعكس كانت دايماً مبسوطة.

— الضابط: يعني أنت كإبن عمها، ممكن تشك في حسام إنه يحاول يقتلها أو يعتدي عليها؟

— حازم (بتردد): لو مكنتش دخلت الغرفة ولقيته واقف جنبها وهي بتنزف، عمري في حياتي ما كنت أشك فيه.حسام دايماً كان حريص جداً على سلامتها وبيخاف عليها من الهوا الطاير وبيتمنى رضاها.

— الضابط (وهو يضيق عينيه بذكاء): طيب اسمع دي بقا.. حسام في أقواله بيقول إنه لما حاول يفتح الباب الرئيسي للفيلا عشان يدخل ينقذها، الباب كان مقفول ومعشق تماماً من جوة، وده اللي اضطره يتسلق البلكونة.. ولما سألنا والدك عبد الله واخت المجني عليها ليلى في المعاينة، قالوا إنهم لما وصلوا وجدوا باب الفيلا الرئيسي مفتوح على بحري ودخلوا منه علطول، ووجدوا كمان باب الجنينة الخارجي مفتوح.. أنت اللي فتحت الأبواب دي وأنت نازل أو وأنت طالع؟

تسمر حازم في مكانه، ودارت الدنيا في رأسه وهو يتذكر أنه لم يترك الباب مفتوح ولا شعر بدخول عاليا او أغلاقها خلفها.. فمن الذي أغلق الباب في وجه حسام وعشقه من الداخل، ثم عاد وفتحه على بحري وهرب قبل دخول حازم الغرفة؟! لمعت صورة "مازن" في عقله فجأة كصاعقة كبرى!