الفصل الرابع عشر

يحارب الطرقات ... يصارع الزمن كى يصل اليه فى أسرع وقت ممكن ... انهياره بهذا الشكل على الهاتف أثار غضبه ..... فهو دائما ذلك الإنسان الهادئ ... الذى يتحكم بمشاعره بقوة .... لكن تخلى عن قوقعته ... فخشى ان يصيبه مكروه ... خشى ان يصاب بالخرس النفسى مجددا ...... لم يستطع ان يتقبل الفكرة ثانيةً ...

يعلم انه بموقف لا يحسد عليه ... فقد وجد أمه على قيد الحياة بعد كل السنوات الماضية ... اين كانت؟؟ واذا هى من ابتعدت بإرادتها لما عادت الان ... ندم للحظات انه أخبره منذ وفاتها ان يتعقل قليلا ويبحث خلف اختفاءها... لم يكن يعلم ان سيظل يبحث حتى الأن ....

شرد قليلا بالماضى ليعيد جزء من الامه المدفونه بأعماقه ولم يخبر بها أحدا حتى الان ....

كان فى بداية شبابه ... يعيش حياة جميلة بين أبوين رائعين ...

حبهم له وحنانهم عليه لم يجعله ان يصدق ما سمعته أذنيه حتى الأن...

كان يجلس مع خالد فى الطابق الأسفل للبناية حين طلب منه "حسين" والد خالد ان يصعد الى أعلى لإستعجال والديه فسيتأخرون على موعد الطائرة ...

فإتجه الى أعلى مسرعا فوجد صوتهم عالى بعض الشئ....

فاسترق السمع محاولا فهم ما يدور بالداخل فوجد أمه تقول

:- انت ضحكت عليا زمان وانا عديتها بمزاجى بس انا من حقى أعرف الحقيقة

:- اهدى يا ناهد ووطى صوتك .... فهمينى ضحكت عليكى فى ايه زمان .... وحقيقة ايه اللى مصرة تعرفيها

وقفت أمامه وهى تنظر لعينيه بقوة وقالت

:- ان عمر مش ابنى ... ابنى مات وانا بولده. ..

نزلت تلك الكلمات على عمر كالصاعقة ... تسمر مكانه لا يصدق ما قالته أمه للتو ... أمه!!! كيف أمه وهى تعترف انه ليس ولدها ... انقذه من توهانه صوت والده هادرا ولكنه مهزوزا بشكل واضح

:- ايه الهبل اللى بتقوليه دة انتى اتجننتى ... وبعدين لما انتى متأكدة كدة .... سكتى السنين اللى فاتت دى ليه واشمعنى جاية تتكلمى دلوقتى؟

فقالت بحزن

:- كنت خايفة اتكلم معاك اتصدم بالحقيقة ... خايفة أنطق يطلع كل اللى فى دماغى صح ... خوفت حياتنا تبوظ وعمر يتأثر

سكتت قليلا ثم اردفت بتوسل

:- علشان خاطرى يا مراد طمن قلبى وريحنى ...

نظر لها بإرتباك ولكنه حاول ان تكون نبرته واثقة

:- أقولك ايه بس .... انا مش مصدق أصلا اللى انتى بتقوليه ... إزاى تفكرى بالشكل دة ...

ابتسمت بسخرية وقالت

:- لازم أفكر كدة ... لأن دى الحقيقة ...

صمتت قليلا تستعيد شيئا من الماضى فأردفت

:- يوم ولادتى كنت تعبانة اوى ... و حالة البيبى مكنتش مستقرة ... سمعت الدكاترة وهما بيقولوا لازم ننقذ حياتها حتى لو على حساب الجنين ... " بدأت دموعها أن تسيل على وجنتيها "

كنت عايزة أصرخ وأقولهم لا ... انا مش مهم ... المهم ابنى ... بس من تعبى مقدرتش أتكلم ... وفى الاخر سمعت صوته نازل بيعيط ... حمدت ربنا و عيطت ربنا إستجاب لدعائى و ابنى كويس ... بس بعد شوية لقيت الدنيا حوليا اتلغبطت والممرضة سمعتها بتقول ان البيبى مات .... محستش بنفسى وقتها غير وغيامة سودا بتنزل ببطء على عينى ... حسيت بروحى بتتسحب منى ....

ولما فوقت لقيتك بتدينى البيبى وبتقولى ابننا اهو ...

كنت عارفة انك بتكذب يا مراد ... بس صدقتك ... صدقتك علشان مفيش قدامى غير انى أصدق و دة كان أفضل حل بالنسبالى ... هبقى أم ومش عايزة أشغل دماغى بحاجة تانية غير ابنى وبس ....

لكن دلوقتى عايزة أفهم الحقيقة ...

قال مراد وهو يقترب من الباب مستعدا للخروج يتجاهل كلامها ... كل هذا تتذكره ... وهو يحسبها تعيش بشكل طبيعى ... فقرر اللجوء لصديقه وابن عمه حسين ليرى ماذا سيفعل ...

:- انا نازل يا ناهد زمان حسين مستنينا ... وإياك تتكلمى مع حد فى الكلام الفارغ اللى انتى قولتيه دلوقتى دة ...

شعر عمر بخروج والده فجرى مسرعا الى أعلى حتى لا يراه أحد ...

أفاق من شروده عندما وصل الى مكان خالد بوقت قياسى ... هرول اليه باحثا عنه بين الموجودين وحينما رآه يقف بثبات واضعا يديه بجيب بنطاله يتأمل تضارب موجات البحر الهائجة ... كأنها تعلم بمكنونات نفسه ...

هدأت خطواته وبدأ فى أخذ أنفاسه بإنتظام... اقترب منه وهو يقول بهيئة لا تحمل للمرح معنى

:- كنت مراهن نفسى انى هلاقيك هنا

انتبه اليه خالد ونظر له بإستغراب

:- انت جيت بسرعة كدة ازاى؟

أجابه الأخر

:- سيبك منى وقولى انت عامل ايه دلوقتى

نظر خالد للفراغ أمامه مرة أخرى وقال بشئ من السخرية ...

:- هكون عامل ايه يعنى ... زى ما انت شايف

فسأله عمر مستفهما

:- طيب ناوى على ايه ...

قال خالد بجدية

:- هى طالما قررت تظهر فى إسكندرية ... يبقى مش بعيد تجيلنا البيت قريب ...

:- و هتعمل ايه

أجابه خالد بهدوء

:- انا مراقب كل تحركاتها .... لما نشوف كاميليا هانم ناوية على ايه ....

ربت عمر على كتف صديقه قائلا

متستعجلش يا خالد .... ومتحكمش غير لما تسمع منها الاول ... يمكن نكون ظالمنها

التفت اليه خالد ورد بثبات

:- انت بتضحك على نفسك يا عمر ولا بتضحك عليا ... ولا تكون بتصبرنى على اللى انا فيه .... متقلقش .... انا يمكن اتصدمت شوية فى الأول .... كان صعب عليا انى الاقى امى اللى ماتت من سنين عايشة ... بس خلاص ... فوقت بسرعة ولازم أحسب خطواتى كويس علشان أعرف الحقيقة ...

ثم أكد عليه قائلا ...

:- مش محتاج أأكد عليك ... مفيش مخلوق يعرف الموضوع دة ...

أومأ عمر برأسه مؤكدا على ذلك ... ثم إتجه كل الى سيارته ...